Dard mein lazzat bahut ashkon mein ranai bahut

dard mein lazzat bahut ashkon mein ranai bahut
ai gham-e-hasti hamein duniya pasand aai bahut

ho na ho dasht-o-chaman mein ek talluq hai zarur
baad-e-sahrai bhi KHushbu mein uTha lai bahut

maslahat ka jabr aisa tha ki chup rahna paDa
warna uslub-e-zamana par hansi aai bahut

be-sahaaron ki mohabbat be-nawaon ka KHulus
aah ye daulat ki insanon ne Thukrai bahut

be-KHayali mein bhi kitne fasle tai ho gae
be-irada bhi ye duniya dur le aai bahut

apni fitrat mein bhi raushan honge lekin ai 'zamir'
meri raaton se bhi taron ne chamak pai bahut