dard ke pile gulabon ki thakan baqi rahi
jagti aankhon mein KHwabon ki thakan baqi rahi
paniyon ka jism sahlati rahi purwa magar
TuTte bante hababon ki thakan baqi rahi
did ki aasudgi mein kaun kaise dekhta
darmiyan kitne hijabon ki thakan baqi rahi
falsafe sare kitabon mein ulajh kar rah gae
dars-gahon mein nisabon ki thakan baqi rahi
barishen hoti rahen 'nasir' samundar ki taraf
regzaron mein sarabon ki thakan baqi rahi
Ghazal
Dard ke pile gulabon ki thakan baqi rahi
Naseer Ahmad Nasir