dard-e-dil mein kami na ho jae
dosti dushmani na ho jae
tum meri dosti ka dam na bharo
aasman muddai na ho jae
baiThta hai hamesha rindon mein
kahin zahid wali na ho jae
tal-e-bad wahan bhi sath na de
maut bhi zindagi na ho jae
apni KHu-e-wafa se Darta hun
aashiqi bandagi na ho jae
kahin 'beKHud' tumhaari KHuddari
dushman-e-be-KHudi na ho jae
Ghazal
Dard-e-dil mein kami na ho jae
Bekhud Badayuni