chhup gaya yar KHud-numa ho kar
rah gai chashm-e-shauq wa ho kar
be-qararon se un ko sharm aai
shoKHiyan rah gain haya ho kar
kya kahun kya hai mere dil ki KHushi
tum chale jaoge KHafa ho kar
ruTh kar un se hum kahan jiten
wo mana lete hain KHafa ho kar
phans gaya dil to chhoD do hum ko
ab kahan jaenge riha ho kar
dil se kuchh kah rahi hain wo aankhen
dekhen kya Thahre mashwara ho kar
hath uTha kar talash-e-dil se 'hasan'
baiTh rahiye shikasta-pa ho kar
Ghazal
Chhup gaya yar KHud-numa ho kar
Hasan Barelvi