chhoTe chhoTe se mafadat liye phirte hain
dar-ba-dar KHud ko jo din raat liye phirte hain
apni majruh anaon ko dilase de kar
hath mein kasa-e-KHairaat liye phirte hain
shahr mein hum ne suna hai ki tere shola-nawa
kuchh sulagte hue naghmat liye phirte hain
muKHtalif apni kahani hai zamane bhar se
munfarid hum gham-e-haalat liye phirte hain
ek hum hain ki gham-e-dahr se fursat hi nahin
ek wo hain ki gham-e-zat liye phirte hain
Ghazal
ChhoTe chhoTe se mafadat liye phirte hain
Aitbar Sajid