Chhaton pe aag rahi baam-o-dar pe dhup rahi

chhaton pe aag rahi baam-o-dar pe dhup rahi
sahar se sham talak bahr-o-bar pe dhup rahi

bahut dinon se jo baadal idhar nahin aae
daraKHt sukhe rahe rahguzar pe dhup rahi

kuchh aise waqt pe nikle the apne ghar se hum
jahan jahan bhi gae apne sar pe dhup rahi

ghurub ho gaya suraj magar fazaon mein
wahi tapish hai ki jaise nagar pe dhup rahi

rawish rawish pe raha aaftab ka saya
jahan-e-ghuncha-o-barg-o-samar pe dhup rahi

araq araq hai jabin pairahan pasina hai
bashar hi jaane ki kaisi bashar pe dhup rahi

jahan-e-karb-o-bala hum ko yaad aaya hai
kuchh aisi ab ke hamare nagar pe dhup rahi

rawan-dawan hamein phirna tha dasht-e-ghurbat mein
kabhi jo ghar mein rahe hain to ghar pe dhup rahi

usi parinde ki surat hamein bhi jina tha
jo din ko uDta raha baal-o-par pe dhup rahi

tamam din mujhe suraj ke sath chalna tha
mere sabab se mere ham-safar pe dhup rahi

yahi to soch ke 'iqbaal' ko nadamat hai
shajar ke sae mein hum aur shajar pe dhup rahi