chashm ne ki gauhar-afshani sarih
ho gai ye hum se nadani sarih
munh chhupa qatil ki teri hi taraf
tak rahi hai chashm-e-qurbani sarih
karbala-e-ishq mein ushshaq ki
tegh o KHanjar par hai mehmani sarih
aaine mein bhi nahin paDta hai aks
hai teri taswir la-sani sarih
zhaala-san kyun-kar ghule jawen na hum
hai jo aansu mein pareshani sarih
kyunki istiqlal ka dam maren hum
ustuKHan apne to hain pani sarih
mazra-e-dil kis tarah sarsabz ho
barq yan karti hai jaulani sarih
mah-e-nau hai kis ke dar ka sajda-pash
ruk gai hai us ki peshani sarih
'mushafi' dam toDe hai marta nahin
kar raha hai ye giran-jaani sarih
Ghazal
Chashm ne ki gauhar-afshani sarih
Mushafi Ghulam Hamdani