chakkhi hai lamhe lamhe ki hum ne miThas bhi
ye aur baat hai ki rahe hain udas bhi
in ajnabi labon pe tabassum ki ek lakir
lagta hai aisi shai thi kabhi apne pas bhi
mansub hongi aur bhi us se hikayaten
ye zaKHm-e-dil ki aaj hai jo be-libas bhi
phaila hua tha sadiyon talak us ka silsila
dariya ke sath sath baDhi apni pyas bhi
'nasir' ko ro raha hun ki tha mera ham-suKHan
go us se ho saka na kabhi ru-shanas bhi
Ghazal
Chakkhi hai lamhe lamhe ki humne miThas bhi
Khalilur Rahman Azmi