chakhi na jis ne kabhi lazzat-e-sinan-e-nigah
maza de phir use kya tegh-e-KHun-chakan-e-nigah
jis anjuman mein ki paDta na tha guman-e-nigah
paDa hai TuT dam-e-raqs aasman-e-nigah
bala se us se hi roz-e-siyah ka haal kahun
ki mil-e-surma hai is ke mizaj dan-e-nigah
dhanak se surme ki chilla hai ta ba-gosha-e-chashm
koi hai said jo phir zah hui kaman-e-nigah
bari hai wajib o mumkin ki qaid se wo husn
na darmiyana-e-mardum na darmyan-e-nigah
hua tha masti ki majlis mein shab guzar apna
kiya nazara-e-mahwiyyat-e-jahan-e-nigah
wo aasman ki taraf dekhe gar uTha kar aankh
gire zamin pe isa bhi kha sinan-e-nigah
na tab nur-e-tajalli ki la saka musa
farogh-e-husn hua bais-e-ziyan-e-nigah
Ghazal
Chakhi na jis ne kabhi lazzat-e-sinan-e-nigah
Mushafi Ghulam Hamdani