chand taron ki bhari bazm uThi jati hai
ab to aa jao hasin raat Dhali jati hai
rafta rafta teri har yaad miTi jati hai
gard si waqt ke chehre pe jami jati hai
mere aage se haTa lo mai o mina o subu
un se kuchh aur meri pyas baDhi jati hai
aaj apne bhi parae se nazar aate hain
pyar ki rasm zamane se uThi jati hai
kis liye kis ke liye kis ke nazare ke liye
chand taron se har ek raat saji jati hai
na hawaen hain muafiq na fazaen lekin
aap hi aap kali dil ki khili jati hai
lakh samjhae koi lakh bujhae phir bhi
dil se 'jawed' kahin dil ki lagi jati hai
Ghazal
Chand taron ki bhari bazm uThi jati hai
Javed Vashisht