chand dhire se muskuraya hai
chand ko kaun yaad aaya hai
KHwab mein bhi nazar nahin aaya
raat jis ne mujhe jagaya hai
hum nahin aae to gila kaisa
aap ne kab hamein bulaya hai
jo likha hi nahin gaya mujh se
dil ne wo git gungunaya hai
tu ne mujh ko bana diya insan
main ne tujh ko KHuda banaya hai
tum se mil kar main us ko bhul gaya
jis ne tum se mujhe milaya hai
Thair kar dekh to zara 'momin'
main nahin hun ye tera saya hai
Ghazal
Chand dhire se muskuraya hai
abdurrahman momin