Chahe sahra mein chahe ghar rahna

chahe sahra mein chahe ghar rahna
zindagi se qarib-tar rahna

jis ke ghar jaana mehman ban kar
us ke ghar yar muKHtasar rahna

chahte ho agar mile shohrat
roz ki taza ek KHabar rahna

ye munafi hai aadamiyat ke
be-KHabar aur KHud-nigar rahna

aanch aane na pae izzat par
tum guhar ho sada guhar rahna

karnamon se apne ai hamdam
tum amar ho to phir amar rahna

ye guzarish hai tum se ai 'ibrat'
umr-bhar mere ham-safar rahna