bigaDte bante daere sawal sochte rahe
na jaane kis ke the wo KHadd-o-KHal sochte rahe
jo ru-numa nahin hua wo marhala Dara gaya
milenge kaise us se mah-o-sal sochte rahe
sitara-dar-sitara sham utri hogi lawn par
akele baiThe hum ba-sad-malal sochte rahe
ajib moD samne the KHwab KHwab bastiyan
bichhaD ke baqi umr ka maal sochte rahe
mile the tum to TuT kar hamin the ghair mutmain
hazar fasle pas-e-visal sochte rahe
hamin yahan wo KHush-qayas-KHush-guman parind the
KHayam-e-reg mein jo barshgal sochte rahe
Ghazal
BigaDte bante daere sawal sochte rahe
Musavvir Sabzwari