Bhulata hun magar gham ki daraKHshani nahin jati

bhulata hun magar gham ki daraKHshani nahin jati
wo aaina muqabil hai ki hairani nahin jati

nigah-e-shauq se ta-der hairani nahin jati
shabab aaya to zalim shakl pahchani nahin jati

tujhe dekhun ki tere iltifat-e-narm ko samjhun
mohabbat bhi tere jalwon mein pahchani nahin jati

sahab o sail dho sakte nahin gard-e-falakat ko
bahaar aai magar duniya ki virani nahin jati

kahan tak sath de sakti hain aankhen sozish-e-dil ka
bahut roya magar gham ki giran-jaani nahin jati

jawani ko gunahon se alag karna nahin mumkin
ye wo mai hai jo fart-e-kaif se chhani nahin jati

mohabbat tar-tar-e-pairahan kar apne kanTon se
ki in phulon se meri tang-damani nahin jati

'nushur' is waqt bhi duniya asir-e-mulak-o-daulat hai
abhi fikr o nazar ta-hadd-e-insani nahin jati