Bezar zindagi se dil-e-muzmahil nahin

bezar zindagi se dil-e-muzmahil nahin
shayad ba-qadr-e-zarf abhi dard-e-dil nahin

apna to us ne sath nibhaya hai umr-bhar
kuchh log kah rahe hain ki gham mustaqil nahin

diwana-e-mafad hai begana-e-KHulus
wo ahl-e-aql-o-hosh sahi ahl-e-dil nahin

shoale kahan se aaenge kaise khilenge phul
zaKHmon ki aag dil mein agar mustaqil nahin

wo to hamari baat ko samjhenge kis tarah
jin ka dimagh to hai magar jin ka dil nahin

kya KHub inhimak hai mahw-e-KHayal ka
'talib' KHuda ki zat bhi is mein muKHil nahin