bewafa kahiye ba-wafa kahiye
dil mein aae jo barmala kahiye
un ke zulm-o-sitam ka kya shikwa
husn ki shoKHi-e-ada kahiye
de diya dil kisi sitamgar ko
aap chahe use KHata kahiye
har KHushi ka nikhaar hai us mein
lazzat-e-gham ko aur kya kahiye
dil kabhi us ko manta hi nahin
aap KHud ko na bewafa kahiye
apne daman ki kuchh KHabar hai 'majid'
soch kar KHud ko parsa kahiye
Ghazal
Bewafa kahiye ba-wafa kahiye
Abdul Majeed Khan Majeed