be-samt raston pe sada le gai mujhe
aahaT magar junun ki bacha le gai mujhe
patthar ke jism mom ke chehre dhuan dhuan
kis shahr mein uDa ke hawa le gai mujhe
mathe pe us ke dekh ke lali sindur ki
zaKHmon ki anjuman mein hina le gai mujhe
KHushbu pighalte lamhon ki sanson mein kho gai
KHushbu ki wadiyon mein saba le gai mujhe
jo log bhik dete hain chehre ko dekh kar
'zarrin' unhin ke dar pe ana le gai mujhe
Ghazal
Be-samt raston pe sada le gai mujhe
Iffat Zarrin