BaKHshi hai kaif-e-ishq ne wo be-KHudi mujhe

baKHshi hai kaif-e-ishq ne wo be-KHudi mujhe
main zindagi ko bhul gaya zindagi mujhe

daur-e-falak pe jab kabhi aai hansi mujhe
aalam-e-rozgar ne aawaz di mujhe

tere KHayal se hai wo dil-bastagi mujhe
hasrat hi ab nahin tere didar ki mujhe

ai marg-e-ishq teri nawazish ka shukriya
duniya ki talKHiyon se faraghat mili mujhe

har shai se be-niyaz hai mera dil-e-hazin
tum kya mile ki mil gae kaunain bhi mujhe

kal tak jo tegh tishna-e-KHun-e-adu rahi
aaj us ki pyas KHud hi bujhani paDi mujhe

faizan-e-warsi se 'aziz'-e-jahan hun main
sab kuchh hai ek silsila-e-warsi mujhe