bahut kuchh likha hai bahut kuchh likhenge
ye tai hai ki ahl-e-qalam hi rahenge
nahin hum nasibon se mayus bilkul
jo hum ban na pae wo bachche banenge
ganwae hain auqat apne jinhon ne
wahi umr bhar hath malte rahenge
rahega jo yunhi sitam ka tasalsul
to tang aa ke hum bhi baghawat karenge
agar adl se nasl mahrum hogi
to phir dekhna log rahzan banenge
jo kahte hain kahte rahen ahl-e-duniya
magar hum to 'naqid' sada sach kahenge
Ghazal
Bahut kuchh likha hai bahut kuchh likhenge
Shabbir Naqid