bahut din tak koi chehra mujhe achchha nahin lagta
mata-e-did pe qabza mujhe achchha nahin lagta
kanizon pe bhi aa sakta hai dil zill-e-ilahi ka
nizam-e-ishq mein shajara mujhe achchha nahin lagta
main kuchh bhi soch sakta hun main kuchh bhi dekh sakta hun
KHayal-o-KHwab pe pahra mujhe achchha nahin lagta
na khiDki hai na aangan hai na roshan-dan hai koi
imarat-saz ye naqsha mujhe achchha nahin lagta
jo hoti hath mein mere to duniya banT deta main
kisi ke hath mein kasa mujhe achchha nahin lagta
Ghazal
Bahut din tak koi chehra mujhe achchha nahin lagta
Hashim Raza Jalalpuri