BaDi danai se andaz-e-ayyari badalte hain

baDi danai se andaz-e-ayyari badalte hain
badalte mausamon mein jo wafadari badalte hain

girani ho ki arzani unhen to mil hi jate hain
zarurat jab bhi hoti hai wo darbari badalte hain

zarurat aise ahl-e-dil ki hai ab mere logon ko
jo tartib-e-rumuz-e-zindagi sari badalte hain

talluq kya faqiran-e-haram ka shahryaron se
hum aise log kab apni wafadari badalte hain

asir-e-maslahat KHud ho gae wo jo ye kahte the
purani maslahat hain suraten sari badalte hain

chalo ek bar phir dar-o-rasan ki aazmaish ho
chalo ek bar phir rasm-e-sitam-gari badalte hain