Badal ke humne tariqa KHat-o-kitabat ka

badal ke hum ne tariqa KHat-o-kitabat ka
chhupa liya hai zamane se raaz ulfat ka

purana zaKHm naya ho gaya to kya hoga
na phenko tir hamari taraf ko nafrat ka

bahaar aai thi chehre pe chaar din ke liye
nasha hai aaj bhi aaankhon mein us latafat ka

kabhi to aao hamare gharib-KHane par
hamein bhi dijiyo mauqa janab KHidmat ka

bahut sambhaal ke rakhna use hifazat se
khilauna TuT na jae meri mohabbat ka

ye musht-e-KHak jo insan ki haqiqat hai
tamasha dekh raha hun main is ki fitrat ka

hamare zarf ko nazron se tol kar 'arif'
uTha raha hai wo tufan ek qayamat ka