baat ko meri alag ho ke na sharmao suno
kuchh kaha chahun hun main tum se idhar aao suno
main to jaane ka nahin ru-ba-ru us ke yaro
kuchh wo gar tum se kahe hai to tumhin jao suno
chheDne ko mere gar aap ka ji chahe hai
be-adab hun main mere haq mein jo farmao suno
baat bhi mano kisi ki koi ye bhi zid hai
apne aashiq ke tain itna na tarsao suno
gul-sanobar ka agar qissa hai tum pas miyan
paDhne wala bhi to maujud hun main lao suno
ai dil o dida maal is ka bura hi samjho
dekh kar us ke tain itna na lalchao suno
'mushafi' baat to kahne do zara qasid ko
pahle hi harf mein tum itna na ghabrao suno
Ghazal
Baat ko meri alag ho ke na sharmao suno
Mushafi Ghulam Hamdani