barish mein aksar aisa ho jata hai
diwar-o-dar par sabza ho jata hai
sakh KHushi ki kyun gir jati hai mujh mein
gham ka parcham kyun uncha ho jata hai
aaKHir-e-shab dariya mein sanp utarte hain
subh talak pani nila ho jata hai
dil ka suna rahna Thik nahin sahab
suna dil aaseb-zada ho jata hai
jhonka aate hi sairab sadaon ka
KHamoshi ka dasht hara ho jata hai
tanha hota hun to mar jata hun main
mere andar tu zinda ho jata hai
Ghazal
Barish mein aksar aisa ho jata hai
Vikas Sharma Raaz