aziz itna tera rang-o-bu lage hai mujhe
koi qarib se guzre to tu lage hai mujhe
safar KHayal ka main kis tarah tamam karun
teri har ek ada chaar-su lage hai mujhe
zarur koi ajab shai hai tujh mein poshida
ki tera zikr bhi ab ku-ba-ku lage hai mujhe
main aasman ki jaanib bhi dekhta hun magar
jo mera chand hai wo KHub-ru lage hai mujhe
main apni zat mein tujh ko talash karta hun
bahut hi sahl teri justuju lage hai mujhe
hai ye bhi ek fusun-e-nigah ai 'rizwan'
nahin wo pas magar ru-ba-ru lage hai mujhe
Ghazal
Aziz itna tera rang-o-bu lage hai mujhe
Rizwanur Raza Rizwan