Aur ab kya kahen ki kya hain hum

aur ab kya kahen ki kya hain hum
aap hi apne muddaa hain hum

apne aashiq hain apne warafta
aap hi apne dil-ruba hain hum

aap hi KHana aap KHana-KHuda
aap hi apni marhaba hain hum

ishq jo dil mein dard ho ke raha
KHud usi dard ki dawa hain hum

raaz-e-dil ki tarah zamane mein
the chhupe aaj barmala hain hum

kyun na ho arsh par dimagh apna
kis ke kuche ki KHak-e-pa hain hum

har koi aashna samajhta hai
aur yan kis ke aashna hain hum

ibtida ki bhi ibtida hain hum
intiha ki bhi intiha hain hum

hum to bande 'nizam' un ke hain
wo baja kahte hain KHuda hain ham