ashk aankhon mein aur dil mein aahon ke sharar dekhe
barsat ke mausam mein jalte hue ghar dekhe
aaKHir ko ye din tu ne ai dida-e-tar dekhe
milte hue miTTi mein anmol guhar dekhe
jalwon ki haden aaKHir kaise mutayyan hon
aankhon ne tere jalwe ta-hadd-e-nazar dekhe
gahnae hue chand aur dhundlae hue suraj
furqat mein in aankhon ne kya sham-o-sahar dekhe
pahuncha de salam us tak hum tira-nasibon ka
jo 'rahi'-e-KHush-qismat tanwir-e-sahar dekhe
Ghazal
Ashk aankhon mein aur dil mein aahon ke sharar dekhe
Rahi Shahabi