Apni KHabar nahin hai ba-juz in qadar mujhe

apni KHabar nahin hai ba-juz in qadar mujhe
ek shaKHs tha ki mil na saka umr bhar mujhe

shoalon ki guftugu mein saba ke KHiram mein
aawaz de raha hai koi ham-safar mujhe

shayad unhin ka ijz mere kaam aa gaya
jin doston ne chhoD diya waqt par mujhe

shab ko to ek qafila-e-gul tha sath sath
ya-rab! ye kis maqam par aai sahar mujhe

hanste rahe falak pe sitare zamin pe phul
achchha hua ki umr mili muKHtasar mujhe

muddat ke baad us ne sar-e-anjuman 'zamir'!
dekha nigah-e-am se aur KHas kar mujhe