apne ji mein jo Than lenge aap
ya hamara bayan lenge aap
justuju qaede ki ho warna
dar-ba-dar KHak chhan lenge aap
ahd-e-hazir ke baad aaega
wo zamana ki jaan lenge aap
yun to ghussa haram hai lekin
roz jab imtihan lenge aap
aap ko mehrban samajhte hain
aur kya nak kan lenge aap
saf kahiye ki chahte kya hain
kya gharibon ki jaan lenge aap
ye harifan-e-kam-nazar ai 'shad'
mujh ko ek roz man lenge aap
Ghazal
Apne ji mein jo Than lenge aap
Shaad Aarfi