apne andaz mein auron se juda lagte ho
tum pujari nahin lagte ho KHuda lagte ho
kis qadar man se roka tha use jaane se
jis ne puchha hai jawaban mere kya lagte ho
nichi nazren kiye simTe hue ghabrae hue
tum mujassam kya kahen us ko haya lagte ho
achchhi lagti ho mujhe tum kya tumhein main achchha
na-mukammal tha sawal us ne kaha lagte ho
mujh se chhin jaoge tum dil ko ye KHadsha bhi nahin
kis ne chhini hai dua tum to dua lagte ho
kya ho tum dhup ki surat kabhi aa chubhte ho
aur kabhi tez kabhi narm hawa lagte ho
Ghazal
Apne andaz mein auron se juda lagte ho
Wajeeh Sani