Apna hi shikwa apna gila hai

apna hi shikwa apna gila hai
ahl-e-wafa ko kya ho gaya hai

hum jaise sarkash bhi ro diye hain
ab ke kuchh aisa gham aa paDa hai

dil ka chaman hai murjha na jae
ye aansuon se sincha gaya hai

han fasl-e-gul mein rindon ko saqi
apna lahu bhi pina paDa hai

ye dard yun bhi tha jaan-lewa
kuchh aur bhi ab ke baDhta chala hai

bas ek wada kam-baKHt wo bhi
mar mar ke jina sikhla gaya hai

jurm-e-mohabbat mujh tak hi rahta
un ka bhi daman uljha hua hai

ek umr guzri hai rah takte
jine ki shayad ye bhi saza hai

dil sard ho kar hi rah na jae
ab ke kuchh aisi ThanDi hawa hai