apna dil pesh karun apni wafa pesh karun
kuchh samajh mein nahin aata tujhe kya pesh karun
tere milne ki KHushi mein koi naghma chheDun
ya tere dard-e-judai ka gila pesh karun
mere KHwabon mein bhi tu mere KHayalon mein bhi tu
kaun si chiz tujhe tujh se juda pesh karun
jo tere dil ko lubhae wo ada mujh mein nahin
kyun na tujh ko koi teri hi ada pesh karun
Ghazal
Apna dil pesh karun apni wafa pesh karun
Sahir Ludhianvi