Ajib tajraba aankhon ko hone wala tha

ajib tajraba aankhon ko hone wala tha
baghair nind main kal raat sone wala tha

tabhi wahin mujhe us ki hansi sunai paDi
main us ki yaad mein palken bhigone wala tha

kisi badan ki sada ne bacha liya mujh ko
main warna ruh ke jangal mein khone wala tha

ye soch soch ke ab to hansi si aati hai
shuru-e-ishq mein kitna main rone wala tha

kabhi hui na mulaqat shahr se meri
main jab bhi so ke uTha shahr sone wala tha

agar yahi hai mohabbat to hone wali thi
wo milne wala tha mujh ko main khone wala tha

mujhe nikal diya taziyat ke jalse se
ki bas wahan main akela hi rone wala tha

ye mera dida-e-tar KHushk ho gaya warna
mere liye bhi yahan koi rone wala tha

is aaine ne usulon pe zid na ki ki warna
main apne aap ke bar-aks hone wala tha

kisi ne mahfil-e-duniya ki dhun badal Dali
zamana jab mera ham-raqs hone wala tha

wahan bas ek dil KHali tha aur miyan-'ehsas'
na ishq un ko hua tha na hone wala tha