ajib saneha guzra hai in gharon pe koi
ki chaunkta hi nahin ab to dastakon pe koi
ujaD shahar ke raste jo ab sunate hain
yaqin karta hai kab un kahaniyon pe koi
hai baat dur ki manzil ka sochna ab tu
ki rasta khulta nahin hai musafiron pe koi
wo KHauf hai ki badan pattharon mein Dhalne lage
ajab ghaDi ki dua bhi nahin labon pe koi
hawa bhi tez na thi jab parinda aa ke gira
nahin tha zaKHm bhi 'jawed' in paron pe koi
Ghazal
Ajib saneha guzra hai in gharon pe koi
Javaid Anwar