Ajib rut hai daraKHton ko be-zaban dekhun

ajib rut hai daraKHton ko be-zaban dekhun
dayar-e-sham mein aahon ka main dhuan dekhun

chahaar samt se aai thi barf ki aandhi
kahin na phul na rangon ki titliyan dekhun

yaqin un ko dilaun chamakte suraj ka
hisar-e-shab mein jo sahme hue makan dekhun

zamin ko tu ne Daraya sada masaib se
kabhi tujhe bhi hirasan ai aasman dekhun

labon pe jis ke musalsal pukar pani ki
usi ki aankh se dariya bhi ek rawan dekhun

lahu-luhan to koi nazar nahin aata
lahu mein Dubi magar sab ki ungliyan dekhun

hamare ahd ke logon ko kya hua 'fikri'
sabhon mein bujhti hui aag ka saman dekhun