Aisa jina bhi kya hai mar mar ke

aisa jina bhi kya hai mar mar ke
wo jahan bhi rahe rahe Dar ke

ab kisi tarah dil nahin lagta
ghar mein sab kuchh to hai siwa ghar ke

sans ka bojh ab nahin uThta
jism KHali hai dhaD bina sar ke

us ko jaane ki kitni jaldi thi
baat sari kahi pa kam kar ke

jalwa dekha lahu ka us ne jab
hosh hi uD gae the KHanjar ke

ret-o-sahil mein sulh phir na hui
thak gai mauj iltija kar ke

zaKHm kuchh is tarah se hanste hain
ashk bahne lage hain nashtar ke

ras aaya gham-e-shanasai
war pahchan ke the KHanjar ke

us ko naraaz hona aata hai?
wari jaun main aise tewar ke