aisa ho zindagi mein koi KHwab hi na ho
andhiyari raat mein koi mahtab hi na ho
sukhe daraKHt ki tarah dariya mein gir paDen
marne ke waste koi sailab hi na ho
puja karen magar na dua ko uThaen hath
shahr-e-hawas mein mabad-e-arbab hi na ho
mar jaen is se pahle ki wo faisla karen
hathon mein koi pyala-e-zahrab hi na ho
'mamun' jal ke KHak mein mil jae chashm-e-tar
aansu bahane chashma-e-sardab hi na ho
Ghazal
Aisa ho zindagi mein koi KHwab hi na ho
Khaleel Mamoon