abr barsa hai na jaane kis liye
phul mahka hai na jaane kis liye
rah-rawan-e-shauq ruKHsat ho gae
chand nikla hai na jaane kis liye
jab tumhaari aarzu baqi nahin
dil dhaDakta hai na jaane kis liye
is qadar shiddat nahin thi tanz mein
ghaw gahra hai na jaane kis liye
kya kahen kaifiyyat-e-'tanwir' hum
sher kahta hai na jaane kis liye
Ghazal
Abr barsa hai na jaane kis liye
Mohammad Tanviruzzaman