ab to be-dad pe be-dad karegi duniya
hum na honge to hamein yaad karegi duniya
zindagi bhag chali maut ke darwaze se
ab qafas kaun sa ijad karegi duniya
hum to hazir hain par ai silsila-e-jaur-e-qadim
KHatm kab wirsa-e-ajdad karegi duniya
samne aaenge apni hi wafa ke pahlu
jab kisi aur ko barbaad karegi duniya
kya hue hum ki na the marg-e-bashar ke qail
log puchhenge to fariyaad karegi duniya
Ghazal
Ab to be-dad pe be-dad karegi duniya
Qateel Shifai