Ab is se pahle ki duniya se main guzar jaun

ab is se pahle ki duniya se main guzar jaun
main chahta hun koi nek kaam kar jaun

KHuda kare mere kirdar ko nazar na lage
kisi saza se nahin main KHata se Dar jaun

zaruraten meri ghairat pe tanz karti hain
mere zamir tujhe mar dun ki mar jaun

bahut ghurur hai bachchon ko meri himmat par
main sar jhukae hue kaise aaj ghar jaun

mere aziz jahan mujh se mil na sakte hon
to kyun na aisi bulandi se KHud utar jaun