ab charaghon mein zindagi kam hai
dil jalao ki raushni kam hai
tab-e-nazzara hai wahi lekin
un ke jalwon mein dilkashi kam hai
badla badla mizaj hai us ka
us ki baaton mein chashni kam hai
kaif-o-masti surur kya mani
zindagi mein bhi ab KHushi kam hai
waqt ne bhar diye hain zaKHm 'majid'
apni aankhon mein ab nami kam hai
Ghazal
Ab charaghon mein zindagi kam hai
Abdul Majeed Khan Majeed