Aawaz de ke KHud ko bulana paDa mujhe

aawaz de ke KHud ko bulana paDa mujhe
apni madad ko aap hi aana paDa mujhe

mujh se tumhaare aks ko karta tha bad-guman
aaina darmiyan se haTana paDa mujhe

phir is ke baad jurat-e-girya nahin hui
ek ashk KHak se jo uThana paDa mujhe

phir yun hua ki jhuT ki aadat si ho gai
phir yun hua ki sach ko chhupana paDa mujhe

pani qubul hi nahin karta tha meri lash
dariya ko apna nam batana paDa mujhe

mehman aa gaya tha so khane ki mez par
jalta hua charagh bujhana paDa mujhe

dharti ke zarf ka hua andaza jab 'munir'
kuchh roz apna bojh uThana paDa mujhe