aashnai hi sahi apni talab koi to ho
is dayar-e-ghair mein bhi ham-nasab koi to ho
shor ghar tak aa gaya hai kucha-o-bazar ka
kuchh to aisa ho yahan pe mohr-e-lab koi to ho
karb-e-tanhai liye aaKHir kahan tak jaiye
hadisa hi ho agarche be-sabab koi to ho
saz ke TuTe hue taron ko phir se joDiye
naghma-e-KHush-rang ya soz-e-tarab koi to ho
shaKH se TuTe hue patte bahut mayus hain
ek chingari sahi un ka bhi ab koi to ho
Ghazal
Aashnai hi sahi apni talab koi to ho
Khalid Jamal