aap ke iltifat ka gham ho
itni chhoTi si baat ka gham ho
aaj un aankhon ki baat yaad aai
aaj kis ko hayat ka gham ho
ishq se ye mazaq Thik nahin
hum ko aur sanehat ka gham ho
main faramosh kar dun aur tum ko
tum to meri hayat ka gham ho
jin pe main bhi yaqin kar na saka
kis ko in hadsat ka gham ho
dil to hai sirf apni zat ka gham
tum magar kaenat ka gham ho
Ghazal
Aap ke iltifat ka gham ho
Nazish Partap Gadhi