Aap aae to KHayal-e-dil-e-nashad aaya

aap aae to KHayal-e-dil-e-nashad aaya
aap ne yaad dilaya to mujhe yaad aaya

arsh se aaj asar ta-lab-e-fariyaad aaya
ek hi aah mein kafir ko KHuda yaad aaya

jaur ke sath tera lutf bhi kuchh yaad aaya
honT par ban ke hansi shikwa-e-bedad aaya

aaj shab mein koi sau bar to bijli chamki
aaj din mein koi sau bar to sayyaad aaya

mere dil mein ajab andaz se aaya nawak
main ye samjha koi mashuq-e-pari-zad aaya

kya kaha phir to kaho bhul gae hum kis ko
sadqe us ke jo tumhein bhul ke yun yaad aaya

fitna-e-hashr ne bhi uTh ke balaen le lin
ajab andaz se mera sitam ijad aaya

san se jhonka koi aaya jo tera baad-e-bahaar
chaunk uThe murgh-e-chaman nawak-e-sayyaad aaya

are qatil abhi bah jaega pani ho kar
samne mere agar KHanjar-e-faulad aaya

yahi gulshan ki hawa hai yahi gulshan ki bahaar
kabhi sayyaad kabhi nawak-e-bedad aaya

nazar aati hain kahin aisi bhi kafir shaklen
dekh kar husn-e-KHuda-dad KHuda yaad aaya

pas se nim nigah dur se mizhgan-e-daraaz
chubhne wale nae nashtar liye fassad aaya

na suna hum ne kabhi bagh mein aai hai bahaar
jo suna bhi to suna hum ne ki sayyaad aaya

kyun nigahen ye gaDhi hain shikan-e-daman par
sadqe andaz-e-haya ke tujhe dil yaad aaya

aashiyan barq ko saunpa mujhe aai jo tarang
aur main uD ke idhar ta-kaf-e-sayyaad aaya

asar aaya bhi to jaise koi fariyaadi ho
hath mein thame hue daman-e-fariyaad aaya

dast-e-matam liye baiThi rahi shirin apne
tesha achchha ki tere kaam to farhad aaya

aisi zid hai to unhen kaun manae yarab
wo ye machle hain ki koi mujhe kyun yaad aaya

liye KHanjar ki rawani thi har ek mauj-e-KHiram
aaj maqtal mein nai shan se jallad aaya

main jo pahuncha to liye uTh ke bagulon ne qadam
najd mein dhum machi qais ka ustad aaya

baDh ke le halqa-e-aghosh mein ai dast-e-junun
beDiyan kaTne kis lutf se haddad aaya

Dar ke sahra-e-bala se jo pukara main ne
qais ne di mujhe aawaz ki farhad aaya

sadqe honTon ke jinhen naz-e-masihai hai
sadqe baaton ke jinhen shewa-e-jallad aaya

de uThin KHun ragen nam jo nashtar ka liya
rang aisa meri taswir mein bahzad aaya

tifl-e-ashk aa ke meri god mein machle jo 'riyaz'
dil-e-marhum mujhe aaj bahut yaad aaya