aankh pe paTTi bandh ke mujh ko tanha chhoD diya hai
ye kis ne sahra mein la kar sahra chhoD diya hai
jism ki bori se bahar bhi kabhi nikal aaunga
abhi to is par KHush hun us ne zinda chhoD diya hai
zehn mera aazad hai lekin dil ka dil muTThi mein
aadha us ne qaid rakha hai aadha chhoD diya hai
jahan dua milti thi allah joDi salamat rakkhe
main ne tere baad udhar se guzarna chhoD diya hai
chaaron shane chit miTTi par gira paDa hun 'tabish'
jaane kis ne dusri jaanib rassa chhoD diya hai
Ghazal
Aankh pe paTTi bandh ke mujhko tanha chhoD diya hai
Abbas Tabish