Aankh patthar ki tarah aks se Khaali hogi

aankh patthar ki tarah aks se KHali hogi
KHun-e-nahaq ki magar jism pe lali hogi

mil ke baiThenge wahi log adhure aadhe
phir wahi mez wahi sard piyali hogi

aise mausam mein wo chup-chap nazar jo aaya
us ne aaankhon mein koi shakl basa li hogi

main ne jo chiz ganwa di use hira kah ke
kisi nadar musafir ne uTha li hogi

us ko lafzon mein utarun to waraq hun raushan
us ki taswir bana lun to misali hogi

mil bhi jae meri KHwahish ka sila jo mujh ko
ruh apni wahi majbur sawali hogi

yar 'fikri' ye chamakte hue jugnu rakh le
raat jangal ki abhi aur bhi kali hogi