Aankh mein dahshat na thi hath mein KHanjar na tha

aankh mein dahshat na thi hath mein KHanjar na tha
samne dushman tha par dil mein koi Dar na tha

us se bhi mil kar hamein marne ki hasrat rahi
us ne bhi jaane diya wo bhi sitamgar na tha

ek pahaDi pe main baiTha raha der tak
shauq se dekha karun aisa bhi manzar na tha

hum se jo aage gae kitne mehrban the
dur talak rah mein ek bhi patthar na tha

raat bahut der se aankh lagti thi zara
nind mein kamra na tha KHwab mein bistar na tha

sher to hum ne bahut Thik kiya tha magar
ab bhi ghalat tha kahin ab bhi barabar na tha

socha tha is bar to ja ke 'zafar' se milen
kya karen 'alwi' magar aisa muqaddar na tha