aaKHir ko rah-e-ishq mein hum sar ke bal gae
mushkil mein hath panw hamare nikal gae
kis kis ko yaad kar ke koi roe ai falak
aankhon ke aage lakh zamane badal gae
ushshaq-e-lucknow ki kashish dekh ai masih
london ke KHub-ru bhi farangi-mahal gae
apna suragh puchhte phirte hain maut se
aafat-zadon ke hijr mein naqshe badal gae
badlo radif aur paDho sher ai 'munir'
kya faeda jo us ke qawafi badal gae
Ghazal
AaKHir ko rah-e-ishq mein hum sar ke bal gae
Muneer Shikohabadi