Aaine par jami hui hairat ko dekhna

aaine par jami hui hairat ko dekhna
kya bar bar ek hi surat ko dekhna

hasil ye hai ki ek hi hai sifr ka hisab
manafi ko dekhna kabhi musbat ko dekhna

ai waqt tu kahin bhi kisi ka hua hai kya
kya tujh ko dekhna teri saat ko dekhna

danishwaran-e-waqt hon jab mahw-e-guftugu
chup rah ke darmiyan meri wahshat ko dekhna

pahle to kaam dekhna mera wara-e-waqt
phir kaam mein dabi hui fursat ko dekhna